لاهو: تيز برساتن جو 44 سالا رڪارڊ ٽٽي ويو، پاڻي اسپتالن ۽ گهرن ۾ داخل، مختلف حادثن ۾ ٻه ڄڻا فوت

پنجاب جي راڄڌاني لاهور ۾ تيز برسات سبب 44 سالا رڪارڊ ٽٽي ويو آهي، جڏهن ته مختلف واقعن ۾ ٻه ڄڻا فوت ٿي ويا آهن.

پنجاب جي راڄڌاني لاهور ۾ تيز برسات جو 44 سالن جو رڪارڊ ٽٽي ويو. مختلف علائقن نشٽر ٽائون، لڪشمي چوڪ، تاج پورا، جوهر ٽائون ۾ برسات سبب گهرن ۾ پاڻي داخل ٿي ويو.

واسا موجب، 44 سالن ۾ سڀ کان وڌيڪ برسات ايئرپورٽ تي 357 ملي ميٽر جڏهن ته نشٽر ٽائون ۾ 299 ملي ميٽر راڪرڊ ڪئي وئي.

لڪشمي چوڪ ۾ 211، تاجپورا ۾ 240 ۽ جوهر تائون ۾ 270 ملي ميٽر برسات رڪارڊ ڪئي وئي. موسميات کاتي موجب برساتن جو سلسلو 6 آگسٽ تائين جاري رهڻ جو امڪان آهي.

ٻئي پاسي شهر جي ٽن وڏين اسپتالن جي مختلف وارڊز ۾ برساتي پاڻي داخل ٿي ويو، ميو اسپتال، سروسز ۽ جنرل اسپتال ۾ مريض ۽ تيماردار پريشان ٿي ويا.

برسات سبب بجلي جو نظام متاثر ٿيو، 288 فيڊرز ٽرپ ٿي ويا. ليسڪو موجب فيلڊ اسٽاف طرفان بجلي بحالي جو ڪم ڪيو پيو وڃي.