Awami Mahaz Sindhi News Papers
لاڳاپيل خبرون
فلسطيني مزاحمتي تنظيم حماس موجب اسماعيل هنيه جي شهادت کان پوءِ نئين سربراهه جي چونڊ جو عمل شروع ڪيو ويو آهي.
حماس طرفان جاري ڪيل بيان ۾ چيو ويو آهي ته پنهنجي تحريڪ جي نئين سربراهه جي چونڊ جي لاءِ وسيع مشاورتي عمل جي شروعات ڪئي وئي آهي، حماس جي شوريٰ ڪونسل جي اجلاس ۾ نئين سربراهه جو فيصلو ٿي ويندو.
ان حوالي سان ذريعن جو چوڻ آهي ته حماس جا ڪيترائي اعليٰ عهديدار اسماعيل هنيه جي جڳهه وٺي سگهن ٿا. اسماعيل هنيه جي نائب صالح العاروي ان کان پوءِ پاڻمرادو حماس جو سربراهه بڻجي سگهيو ٿي پر اهو پهريان ئي جنوري ۾ اسرائيل جي هڪ حملي ۾ شهيد ٿي چڪو آهي.
حماس جو اڳوڻو سربراهه خالد مشعل مضبوط اميدوار ٿي سگهي ٿو جيڪو ٿڌي طبيعت جو مالڪ آهي، اهڙي طرح خليل الحيه جنهن کي حماس ۾ هڪ مضبوط شخصيت سمجهيو ويندو آهي ۽ اسماعيل هنيه جي ويجهن ساٿين ۾ به شمار ڪيو ويندو آهي انهي جو نالو به غور هيٺ آهي.
هنيه جو هڪ ٻيو نائب زاهر جبارين آهي، جنهن کي حماس جي مالياتي ۽ انتظامي معاملن ۾ اهم ڪردار ادا ڪرڻ سبب حماس جو سي اي او چيو ويندو آهي. ايران سان ويجها لاڳاپا هجڻ سبب ان جا به حماس جي ايندڙ سربراهه بنجڻ جا امڪان آهن.
فلسطيني تنظيم جو هڪ ٻيو اهم ترين اڳواڻ يحي الستوار جيڪو غزه ۾ جاري جنگ جي قيادت ڪري رهيو آهي اهو به اسماعيل هنيه جي جڳهه سنڀالي سگهي ٿو.
