Awami Mahaz Sindhi News Papers
لاڳاپيل خبرون
پاڪستان ايڪسچينج پروگرام جي تحت پوليس آفيسرن کي تربيت جي لاءِ ترڪيه اماڻڻ جو فيصلو ڪيو ويو آهي.
ترڪيه جي سفير ڊاڪٽر مهمت پاچاجي گهرو وزارت پهتو جتي سندس وفاقي گهرو وزير محسن نقوي سان ملاقات ٿي ملاقات ۾ پاڪستان ترڪيه لاڳاپن ۽ گڏيل دلچسپي جي معاملن تي تفصيلي ڳالهيون ڪيون ويون. ملاقات ۾ سيڪيورٽي پوليس ۽ سول آرمڊ فورسز جي شعبن ۾ تعاون وڌائڻ تي اتفاق ڪيو ويو جڏهن ته ايڪسچينج پروگرام جي تحت پاڪستاني پوليس آفيسرن کي تربيت جي لاءِ ترڪيه اماڻڻ جو فيصلو ڪيو ويو.
گهرو وزير محسن نقوي چيو ته 14 آگسٽ کان ترڪيه جي شهرين کي بنا ڪنهن فيس جي آن لائن ويزا جي سهوليت ملي سگهندي. اهڙي قدمن سان ترڪيه جي ڀيڻ ڀائرن کي پاڪستان اچڻ ۾ تمام گهڻي آساني ٿيندي. محسن نقوي چيو ته ترڪيه جي حڪومت جي دعوت تي آڪٽوبر ۾ ترڪيه جو دورو ڪندس، دوري ۾ گڏيل تعاون وڌائڻ جي لاءِ نتيجا ڏيندڙ تجويزون پيش ڪنداسين.
هن چيو ته پاڪستان ترڪي کي پنهنجو ٻيو گهر سمجهي ٿو، ترڪيه سان پراڻا مذهبي، ثقافتي ۽ واپاري رابطا آهن جن کي وڌيڪ مستحڪم ڪرڻ چاهيون ٿا. ملاقات ۾ ترڪيه ۾ قيد پاڪستانين کي آزاد ڪرڻ جي حوالي سان به ڳالهيون ڪيون ويون.
ملاقات دوران ترڪيه جي سفير چيو ته پاڪستان سان ڀائراڻن لاڳاپن کي تمام گهڻي اهميت ڏيندا آهيون پاڪستان سان مختلف شعبن ۾ تعاون جاري رکنداسين. وفاقي گهرو سيڪريٽري خرم علي آغا ۽ ايڊيشنل گهرو سيڪريٽري رفعت مختار راجا به ان موقعي تي موجود هئا.
